Llapi ka pësuar humbjen e radhës në këtë edicion në Superligën e Kosovës në futboll, derisa sot është mposhtur në udhëtim te Gjilani me rezultat 2-1, raporton Llapi.info.
Në minutën e 19-të ishte pikërisht Rivera që shënoi për 1-0, duke i dhënë Llapit epërsinë.
Ky ishte goli i vetëm në këtë pjesëlojë, ndërsa pjesa e dytë doli të jetë shumë interesante. Gjilanifitoi penallti në minutën e 65-të, pas kontrollimit të VAR, ku shihej ndërhyrja jo sportive e Kushtrim Shabanit në Elton Calen.
Nga pika e bardhë doli të jetë i saktë Gerhard Progni për 1-1.
Në minutën e 83-të sërish ka ndërhyrë VAR-i, duke bërë që Muhamed Dubova i Gjilanit të ndëshkohet me karton të kuq.
Por Gjilani donte fitoren dhe golin e epërsisë e arriti në minutën e 87-të, ku Armend Halili shënoi me kokë pas një topi të ardhur nga rivënia këndore (2-1).
Arbnor Ramadani kishte dy gjuajtje të bukura në kohën shtesë, por në të dyja rastet Enea Koliqi ishte në vend.
Gjilani pas fitores kalon në vendin e tretë me 12 pikë, ndërsa Llapi mbetet i fundit me vetëm 3 pikë.
Në xhiron e radhës, Llapi pret Dukagjinin, kurse Gjilani i shkon Malishevës./Llapi.info
