Rafet Azemi, ka rrëfyer publikisht luftën e tij kundër kancerit dhe vështirësitë që i pati.
Ai ka publikuar dy fotografi, njëra e bërë në nëntor të vitit të kaluar dhe tjetra gjatë ditës së djeshme.
Azemi ka falenderuar të gjithë për ndihmën që ia kanë ofruar dhe ka dhënë një porosi që mos të dorëzohen dhe mos ta humbasin besimin në Zot.
Shkrimi i plotë pa ndërhyrje:
ELHAMDULILAHI RABBI’L ALEMIN!
Së pari dhe mbi të gjitha, falënderimi i takon Allahut të Madhëruar, i Cili më dha forcë atëherë kur ndihesha i dobët, më dha shpresë atëherë kur rruga dukej e errët dhe më mbajti të fortë në ditët më të vështira të jetës sime.
3 nëntor 2025 – 3 nëntor 2026.
Fotografia e parë është bërë më 3 nëntor 2025, pas kimioterapisë dhe radioterapisë. Një periudhë e vështirë, me shumë sfida fizike dhe shpirtërore, me ditë që vetëm ai që i ka përjetuar mund t’i kuptojë.
Fotografia e dytë është e sotme, më 3 nëntor 2026. Një vit më vonë, me një pamje tjetër, me më shumë forcë, me buzëqeshje dhe me një mirënjohje të pafund për çdo ditë të jetës.
Por në këtë rrugëtim nuk kam qenë vetëm.
Falënderimi im i veçantë shkon për familjen time, gruan fëmin e mi dhe për vëllezërit dhe motrat e mia, për nipat dhe mbesat e mia, të cilët më qëndruan pranë me dashuri, kujdes, lutje dhe mbështetje të pakushtëzuar. Prania juaj ishte një forcë e madhe për mua. Nuk ka fjalë që mund ta përshkruajnë mirënjohjen që kam për secilin prej jush. Allahu ju ruajtë, ju shpërbleftë dhe ju dhëntë shëndet e lumturi!
Dua t’u drejtohem edhe të gjithë atyre që sot po përballen me kancer, që janë në kimioterapi, radioterapi apo në çfarëdo faze të këtij rrugëtimi.
Ju lutem, mos e humbni shpresën!
Mos e lejoni sëmundjen t’jua marrë besimin, guximin dhe dëshirën për të jetuar. E di që ka ditë kur lodhja është e madhe, kur pasqyra nuk ju tregon njeriun që keni qenë dhe kur mendimet bëhen më të rënda se vetë dhimbja. Por ju lutem, vazhdoni të luftoni, besoni në Allahun, dëgjoni mjekët dhe mos hiqni dorë nga shpresa.
Unë nuk po them se rruga është e lehtë, as se çdo histori përfundon njësoj. Por dua t’ju them se edhe pas ditëve më të vështira mund të vijnë ditë më të bukura. Mos e matni forcën tuaj me pamjen që shihni në pasqyrë, por me guximin që tregoni çdo ditë për të vazhduar përpara.
Sëmundja mund ta lodhë trupin, por mos ia dorëzoni edhe shpirtin dhe shpresën!
O Allah, Ti që je Shëruesi i çdo sëmundjeje, shëroji të gjithë ata që vuajnë, lehtësojua dhimbjet, forcoju zemrat dhe mos ua humb kurrë shpresën. Jepu shërim të plotë, sabër dhe forcë familjeve që po qëndrojnë pranë tyre. Amin!
Sot nuk e festoj vetëm kalimin e një viti. Sot falënderoj Allahun për jetën, për familjen, për njerëzit që më qëndruan pranë dhe për çdo mëngjes që më jep mundësinë të zgjohem, të buzëqesh dhe të vazhdoj përpara.
ELHAMDULILAH PËR ÇDO GJË!
Jeta është dhuratë. Shëndeti është mirësi. Familja është bekim. Shpresa është forcë.
Mos e humbni kurrë besimin në Allahun, sepse mëshira e Tij është më e madhe se çdo vështirësi që mund të përjetojmë.
