Lokale - eSIMy

Agjencia e Ushqimit dhe Veterinarisë (AUV) ka urdhëruar tërheqjen e menjëhershme nga tregu të një serie të qumështit VITA UHT 3.2% yndyrë, të prodhuar nga kompania ABRAZEN SH.P.K., pasi analizat laboratorike të kryera në Austri dhe Kosovë kanë konfirmuar praninë e substancës toksike aflatoksinë M1 mbi nivelin maksimal të lejuar, shkruan Gazeta Sinjali.

Sipas njoftimit zyrtar të AUV-së, produkti i përfshirë në këtë masë është VITA – Qumësht UHT 3.2% yndyrë (paketimi 1 litër), me datë prodhimi 18.07.2026 dhe afat përdorimi deri më 18.01.2027.

Thirrje urgjente për qytetarët

AUV u bën apel të gjithë qytetarëve që e kanë blerë këtë seri të qumështit që të mos e konsumojnë atë dhe ta kthejnë menjëherë në pikat e shitjes. Kompania prodhuese është obliguar që të ndalojë shitjen, ta tërheqë produktin nga raftet dhe të dokumentojë sasitë e grumbulluara.

Nga Agjencia bëjnë me dije se masa e tërheqjes vlen vetëm për këtë seri specifike, ndërsa seritë dhe produktet e tjera të të njëjtit prodhues mbeten nën monitorim.

Çfarë zbuluan analizat laboratorike?

Konfirmimi i fundit ka ardhur nga Instituti për Sigurinë e Ushqimit në Linz (AGES) në Austri, ku është konstatuar përqendrim i aflatoksinës M1 prej 0.065 µg/kg, ndërkohë që kufiri maksimal i lejuar me ligj është 0.050 µg/kg. Ky rezultat përputhet me analizat e Laboratorit të Ushqimit dhe Veterinarisë (LUV) në Kosovë, i cili paraprakisht kishte gjetur tejkalime në tri mostra të këtij qumështi.

Tejkalime të përsëritura nga i njëjti prodhues

Ky rast nuk është i izoluar për kompaninë ABRAZEN SH.P.K. Së fundmi, edhe autoritetet në Maqedoninë e Veriut kishin evidentuar tejkalime të larta të aflatoksinës M1 (0.100 dhe 0.139 µg/kg) në dy analiza të produktit LAND Milk UHT 3.2%, i cili prodhohet nga i njëjti operator.

Për shkak të këtyre tejkalimeve të përsëritura, AUV ka paralajmëruar zgjerimin e kontrolleve në të gjithë zinxhirin e prodhimit – duke përfshirë qumështin e papërpunuar, fermat, gjurmueshmërinë e furnizimit dhe ushqimin e kafshëve – për të zbuluar burimin e kontaminimit. Masat ndëshkuese administrative dhe ligjore ndaj prodhuesit do të merren pas përfundimit të verifikimeve shtesë.

Aflatoksina M1 është substancë toksike që kalon në qumësht përmes ushqimit të kontaminuar të kafshëve dhe ekspozimi afatgjatë ndaj saj përbën rrezik serioz për shëndetin e konsumatorëve. AUV njofton se nga kontrollet e gjera të realizuara gjatë periudhës gusht–nëntor 2026 në qumështin vendor dhe atë të importuar, mostrat e tjera kanë rezultuar brenda normave të lejuara.