Lokale - eSIMy

Një ngjarje e rëndë ka ndodhur pasditen e sotme në Gjakovë, ku një grabitje e armatosur është përcjellë me të shtëna me armë zjarri, duke lënë të lënduar një person.

Rastin për Gazetën Sinjali e ka konfirmuar zëdhënësja e Policisë së Kosovës për rajonin e Gjakovës, Vlera Krasniqi.

Sipas saj, informacioni është pranuar rreth orës 17:00, për një grabitje në një objekt afarist në rrugën “Sylejman Hadum Aga”.

“Rreth orës 17:00, Policia ka pranuar informacion përmes linjës zyrtare telefonike lidhur me një grabitje të ndodhur në një objekt afarist, në rrugën ‘Sylejman Hadum Aga’ në Gjakovë, gjatë së cilës kishte të shtëna me armë zjarri ku si pasojë një person ka pësuar lëndime trupore dhe ka pranuar trajtim mjekësor”, ka deklaruar Krasniqi për Sinjalin.

Ajo bëri të ditur se njësitet përkatëse policore kanë dalë menjëherë në vendin e ngjarjes dhe janë duke ndërmarrë të gjitha veprimet e nevojshme hetimore për zbardhjen e plotë të rrethanave, si dhe për identifikimin dhe arrestimin e personave të dyshuar.