Komuna e Podujevës ka ftuar shitësit ambulantë/tregtarët që të aplikojnë për shfrytëzim të tezgave në tregun e gjelbër, raporton Llapi.info.
Sipas njoftimit të Komunës, vitin e kaluar janë ndarë disa prej tyre, por që numri ende nuk është përmbushur, për çka, Komuna e Podujevës ka bërë thirrje që të aplikojnë tregtarët.
“Bazuar në kërkesat/aplikimet e shitësve ambulantë/tregtarëve, vitin e kaluar janë ndarë tezga, mirëpo në treg ka ende tezga të lira për të cilat ftohen të interesuarit për t’i marrë në shfrytëzim, andaj Komuna e Podujevës ju fton që të aplikoni në Drejtorinë për Planifikim dhe Zhvillim Ekonomik, për ndarjen e tezgave në Tregun e Gjelbër të qytetit”, thuhet në njoftim.
Më tej, është bërë e ditur se afati për aplikim është hapur dje më 26 prill dhe i njëjti do të jetë në dispozicion deri më 5 maj të këtij viti.
“Njoftohen të gjithë shitësit ambulantë/tregtarët, veprimtaria apo aktiviteti do të realizohet brenda hapësirës së tregut të gjelbër e cila është e destinuar për atë qëllim dhe nuk do të lejohet zhvillimi i aktiviteteve të tilla në kuadër të hapësirave tjera në qytet”, thuhet në njoftimin shtesë.
