Sipas deputetit të PDK-së, Enver Hoxhaj, kryeministri në detyrë Albin Kurti ka shfaqur tendencë absolutiste të menaxhimit të Qeverisë.
Në Deskun e Kohës, Hoxhaj ka folur për rrëzimin e Qeverisë duke thënë se “ky veprim ka qenë hap i duhur” e se prishja e qeverisë “erdhi nga vetë ata që ishin në pushtet”. Hoxhaj ka thënë se nëse dy parti në kohë pandemie, krizën shëndetësore e kthyen në krizë politike “ne s’mund të kemi pritje se ato do të menaxhojnë vendin gjatë pandemisë”.
“Vlerësimi im, në pikëpamjen edhe partiake edhe personale pse erdhi te prishja e qeverisë është nga mënyra si negociuan, prej mënyrës si krijuan kabinet pa program politik e prej mosbesimit të thellë dhe prej tendencës goxha absolutiste të kryeministrit për të menaxhuar qeverinë siç menaxhon partinë politike. Kjo çoi te prishja e Qeverisë. Në Qeveri mund të kesh pikëpamje të ndryshme por duhet të harmonizohen. Në demokraci udhëheq edhe partia e parë, edhe e dytë, edhe e tretë, është sistem kompleks”, ka thënë Hoxhaj.
Sipas Hoxhajt, tendencë absolutiste ka qenë edhe “mënyra e shkarkimit të ministrit të Punëve të Brendshme Agim Veliu”.
Megjithatë, ai ka thënë se ky ka qenë vetëm pretekst për rrëzimin e Qeverisë, por ka shtuar se “Kurti ka qenë i papranueshëm edhe për LDK-në, por edhe për partnerët e Kosovës”.
Tutje ai ka kritikuar qasjen e Kurtit me deklaratat për SHBA-në dhe ambasadorin Richard Grenell.
