Lëvizja Vetëvendosje ka njoftuar për takimin e Albin Kurtit me presidenten e Kosovës Vjosa Osmani për caktimin e datës për zgjedhjet lokale.

Në njoftim thuhet se Vetëvendosje, ashtu siç fitoi në Podujevë me mbi 50 për qind e po ashtu edhe në zgjedhjet e 14 shkurtit, e tillë do të jetë edhe fitorja në zgjedhjet lokale.

“Sot kryeministri Albin Kurti, si kryetar i subjektit më të madh, Lëvizjes VETËVENDOSJE! takoi presidenten e Republikës, znj. Vjosa Osmani për të diskutuar mbi datën e zgjedhjeve.
Qytetarët dhe vendi ynë presin një ndryshim të madh në nivelin lokal, ashtu si edhe në nivelin qendror. Fitorja mbi 50% e Lëvizjes VETËVENDOSJE! në zgjedhjet lokale në Podujevë paralajmëroi fitoren dhe mandatin e fuqishëm tonë në zgjedhjet qendrore të mbajtura me 14 shkurt. E pikërisht fitorja mbi 50% në këto zgjedhjet e fundit qendrore paralajmëron mandatet e fuqishme që do t’i marrim nëpër shumicën e komunave të Kosovës. Po shkojmë drejt fitores për shkak se ndryshimi që ka filluar do e marrë formën e tij të plotë, për shkak se zhvillimi i gjithmbarshëm që ka filluar po e kërkon zhvillimin e secilës pjesë. Në këtë kuptim, qëndrimi që kryetari ynë, z. Kurti, paraqiti në presidencë ishte që data për zgjedhjet lokale të caktohet sa më shpejt e ato të mbahen sa më parë”, thuhet në njoftimin e VV-së.

Zgjedhjet lokale në Kosovë pritet të mbahen në muajin tetor.