Thaçi theksoi se për Ushtrinë janë vonuar pesë vjet kot
Presidenti i vendit, Hashim Thaçi tha se nesër do t’i nënshkruaj ligjet për Ushtrinë dhe se nesër do zyrtarizohet themelimi i ushtrisë së Kosovës.
Thaçi e ritheksoi se Ushtria e Kosovës është e koordinuar me partnerët ndërkombëtar, raporton lajmi.net.
Sipas Thaçit kanë shkuar pesë vjet kot pa ushtri, pasi sipas tij ka pasë mundësi që brenda 2014-ës të themelohet.
“Shpesh jam ndier shumë i vetmuar në angazhimet dhe përkushtimet e mija me ndërkombëtarët për me themelu ushtrinë, por është mirë që në fund i gjithë spektri politik ka votu”, tha Thaçi.
Ndërsa, në pyetjen që gazetarja e lajmi.net e ka pyetur presidentin se çka do të humbë Kosova nëse arrihet një marrëveshje finale me Serbinë pasi kjo e fundit vazhdimisht deklaron se nuk do të heq dorë nga Mitrovica Veriore, Ujmani, Asociacioni..?
Thaçi ka thënë se nga arritja e marrëveshjes Kosovë-Serbi, vendi ynë e fiton njohjen nga Serbia dhe pesë vendet e Bashkimit Evropian.
“Po tregoj më së pari se çka fiton se aty jam i fokusuar. Do të thotë e fiton njohjen nga Serbia, e fiton njohjen nga pesë vendet e Bashkimit Evropian nëse arrihet marrëveshja dhe unë shpresoj që do të arrihet dhe besoj në atë drejtim. E fiton njohjen globale sepse do të jetë pjesë e Organizatës së Kombeve të Bashkuara, do të bëhet pjesë e të gjitha organizatave ndërkombëtare dhe nuk kemi më nevojë të shkojmë sikur nëpër INTERPOL dhe e fiton të ardhmen e sigurt për në NATO dhe Bashkimin Evropian”, ka thënë Thaçi.
Sipas tij, nëse Kosova nuk arrinë marrëveshje e fiton një izolim të plotë ndërkombëtar.
“Çka nëse nuk arrin marrëveshje me fajin e vet, e fiton një izolim të plotë ndërkombëtar, moszhvillim, regres, papunësi edhe një gjendje që nuk e meritojnë qytetarët e Kosovës. Prandaj asnjë lider i vendit nuk guxon të mbajë peng të drejtën e qytetarëve të Kosovës dhe dëshirën e qytetarëve të Kosovës që të lëvizin më shpejt drejt së ardhmes evropiane. E di që ka tillë që mund të thonë se po mirë jemi kështu, natyrisht se mirë janë kryeministrat, presidenti, ministrat, edhe deputetët mund të jenë mirë por qytetarët e vendit nuk janë mirë dhe nuk mund të vazhdohet me këtë status quo”, ka deklaruar presidenti.
Sipas tij, kjo status quo është regres për vendin tonë.
