Një ngjarje e rëndë ka tronditur qytetin e Stuttgartit në Gjermani. Në një banesë në lagjen Feuerbach, policia ka gjetur trupat e pajetë të një gruaje dhe dy fëmijëve të saj.
Sipas mediave gjermane, ngjarja u zbulua të mërkurën rreth mesditës, pasi fqinjët kishin njoftuar autoritetet për një situatë të dyshimtë në banesë. Pas ndërhyrjes së policisë dhe ekipeve emergjente, në shtëpi u gjetën tre persona të vdekur.
Hetimet janë duke vazhduar, ndërsa shkaqet e vdekjes ende nuk janë sqaruar. Policia ka deklaruar se aktualisht nuk ka shenja që tregojnë për përfshirje të ndonjë personi të tretë, por të gjitha pistat janë ende të hapura.
Zona është rrethuar nga forcat policore, ndërsa ekspertët e krimit po kryejnë ekzaminimet në vendin e ngjarjes. Banorët e lagjes janë tronditur nga lajmi, duke e përshkruar familjen si “të qetë dhe shumë të sjellshme”.
Rasti ka ngjallur reagime të shumta në opinionin publik gjerman, ndërsa pritet që policia të publikojë më shumë detaje pas përfundimit të autopsisë.
