Presidenti i Kosovës, Hashim Thaçi ka takuar sot kryetaren e Komisionit Qendror të Zgjedhjeve, Valdete Dakën, njofton Llapi.info.
Me këtë rast, presidenti i vendit dhe Daka kanë biseduar për mundësitë e organizimit të zgjedhjeve të jashtëzakonshme për lryetar në Komunën e Podujevës dhe në Komunën e Mitrovicës së Veriut.
“Në mbështetje të nenit 6 të Ligjit Nr. 03/L-094 për Presidentin e Republikës së Kosovës, nenit 4 të Ligjit nr. 03/L-072 për Zgjedhjet Lokale në Republikën e Kosovës, si dhe duke marrë parasysh kërkesën e Komisionit Qendror të Zgjedhjeve, Presidenti i Republikës së Kosovës kishte shtyrë mbajtjen e zgjedhjeve të jashtëzakonshme për Kryetar në Komunën e Podujevës dhe në Komunën e Mitrovicës së Veriut, me qëllim të parandalimit të përhapjes së pandemisë COVID-19”, thuhet në njoftimin për media.
Ndërkohë, është raportuar zgjedhjet për të parin e Podujevës pritet të mbahen me 22 nëntor.
Zgjedhjet për kryetar të Komunës së Podujevës vijnë pasi ish-kryetari i kësaj komune, Agim Veliu dha dorëheqje për t’u emëruar si Ministër i Punëve të Brendshme dhe Administratës Publike. Ky vendim çoi Podujevën në zgjedhje të jashtëzakonshme./Llapi.info
