Deputeti i PDK-së, Abelard Tahiri, ka thënë se kryeministri në detyrë, Albin Kurti, por vepron mbi standarde të dyfishta, derisa parimet e tij i quan farsë.
Ai ia ka kujtuar Kurtit kritikat që i ky i fundit ia kishte bërë Ramës kur Vuçiqi kishte ndihmuar Shqipërinë pas tërmetit.
“Kur Aleksandër Vuçiq pat shkuar në Tiranë, për ndihma, menjëherë pas tërmetit, përgjigja e Vetëvendosjes ishte se Rama po ia mundësonte një krimineli të luftës të duket si bamirës! Pranimin e 1000 testeve për COVID19, ndërkaq, Albin Kurti e quajti ‘veprim humanitar’ të Serbisë. Kjo tregon se Kurti vepron mbi standarde të dyfishta dhe parimet e tij janë farsë. Për më keq, tregon se diskursi i tij ndaj Serbisë ka qenë veç një strategji elektorale opozitare dhe asgjë më shumë”, ka shkruar Tahiri në Facebook.
Tahiri tutje ka shkruar se Vuçiqi ia dha këto teste Kosovës pikërisht në ditët e eksodit, në përvjetorin e deportimit masiv të shqiptarëve nga Kosova.
“Në këtë përvjetor, në vend se të flitej për trashëgiminë e tij kriminale në Kosovë, bota e përgëzoi për veprimin e tij humanitar në Kosovë dhe mediat ndërkombëtare e portretuan atë si solidar. Pra, Albin Kurti ia mundësoi një ‘PR’ botëror, me pasoja të rënda politike për shtetin tonë, presidentit të Serbisë”, ka shkruar Tahiri.
Për edhe më keq se kaq, shton Tahiri, pas dërgimit të mjekëve serbë në komunat veriore, të cilat Kurti i braktisi plotësisht, kjo i ndihmoi Serbisë ta paraqesë Kosovën si një vend pa kapacitete për ta menaxhuar këtë situatë.
“Me fjalë të tjera, Albin Kurti që flet për nder, krenari dhe dinjitet, ia shtriu dorën Serbisë për ta mbuluar keqmenaxhimin e tij. Presidenti i Malit të Zi i refuzoi ventilatorët e Serbisë dhe preferoi t’i marrë ato prej vendeve tjera, pikërisht për të mos rënë në këtë grackë politike dhe ideologjike të Vuçiqit. Pra, para se ta shihni këtë çështje si veprim humanitar i Serbisë ndaj Kosovës, shiheni si kontribut të madh politik të Albin Kurtit për t’ia përmirësuar imazhin ndërkombëtar presidentit të Serbisë”, ka thënë Tahiri.
