Është rritur numri i rasteve të reja me virusin korona në Podujevë. Në vetëm shtatë ditët e fundit, 16 raste janë konfirmuar nga Instituti Kombëtar i Shëndetit Publik, raporton Llapi.info.
Numri më i lartë është shënuar të dielën, me gjithsej 6 raste. Përveç pjesëtarëve të FSK-së, edhe punëtorë shëndetësorë në QKUK nga kjo komunë kanë rezultuar pozitivë. Ndërkaq, dje u konfirmuan edhe për tri raste pozitive krejtësisht të reja, të cilat s’i përkasin rasteve të kontakteve të familjeve të konfirmuara më parë me COVID-19 në këtë rajon. Burimi i tyre i infeksionit ende nuk dihet. Dy prej tyre janë nga qyteti, e tjetri nga fshati Gllamnik.
Epidemiologia e QKMF-së në Podujevë, Bedrie Rama, i ka thënë portalit Llapi.info se numri i rasteve aktive në këtë komunë ka arritur në 28.
“Tani i kemi 28 raste aktive. Tetë pacientë i kemi në Prishtinë, gjegjësisht katër në Pulmologji dhe katër të tjerë në Klinikën Infektive. Gjendja e tyre është mesatare dhe s’janë rëndë, kurse këta të tjerët janë me gjendje të mirë dhe stabile”, ka thënë ajo, duke shtuar se numri i rasteve mund të rritet ditëve në vijim.
Rama vazhdimisht ka apeluar tek qytetarët llapjanë që t’u përmbahen rekomandimeve të IKSHPK-së dhe t’i zbatojnë masat parandaluese të kësaj pandemie.
“Na lejoni që t’i kthehemi normalitetit, t’i kthehemi avancimit të shërbimeve shëndetësore dhe ta menaxhojmë sa më mirë pandeminë dhe ta largojmë sa më shpejtë nga jeta jonë e përditshme. Mbani maskë, mbani distancën, mbani higjienën, respektoni rekomandimet e Institutit Kombëtar të Shëndetësisë Publike, respektoni manualin për mbrojtjen nga përhapja e COVID-19 i miratuar nga Ministria e Shëndetësisë dhe Qeveria e Republikës së Kosovës”, tha Zemaj.
Që nga mesi i marsit, kur edhe janë konfirmuar rastet e para, autoritetet kosovare deri më tani kanë regjistruar 2,878 të infektuar me COVID-19. Prej tyre, 51 pacientë kanë ndërruar jetë dhe që të njëjtit kanë pasur edhe sëmundje tjera shoqëruese./Llapi.info
