Po vazhdon aksioni për largimin e mallrave serbe me mbishkrime antikushtetuese. Një gjë të tillë e ka konfirmuar edhe Komuna e Prishtinës.
“Inspektorët e Rendit Komunal, për të tretën ditë me radhë, kanë vazhduar aksionin për largimin e mallrave të importuar nga Serbia që i drejtohen Kosovës si ‘Kosove dhe Metohi’, ‘Kosovo Unmik’, ‘Kosovo 1244’, ‘Kosove Rezoluta 1244’, si dhe me emërtime të tjera në kundërshtim me emrin kushtetues të shtetit tonë. Gjithashtu, janë larguar edhe mallrat që si adresë kanë një qytet të caktuar, e jo Republikën e Kosovës”, thuhet në njoftimin e Komunës së Prishtinës.
Aksioni do të vazhdojë nëpër secilën pikë të shitjes brenda territorit të kryeqytetit.
