Kryeministri i Kosovës, Albin Kurti u ka bërë thirrje deputetëve të Kosovës që ta votojnë buxhetin.
Ai tha se në situatën aktuale, ka gjasë që mos të mbahet më asnjë seancë javëve në vijim.
“Kjo situatë është e pazakonshme, nuk e kemi hasur që prej çlirimit. Urojmë që të arrijmë të ulim shpejtësinë e shtrirjes së COVID-19. Edhe ne nuk do të donim që gjithçka të bëhet brenda një dite, por nuk ka garancion që mund të mbajmë seanca në javët apo ditët në vijim sepse nuk e dimë se çka do të ndodhë me virusin. As ne nuk jemi në rregull këtu me rregullat e përcaktuara. Nuk mund të kemi buxhet emergjent pa pasur buxhet të ri. Ju ftoj që ta kalojmë sot buxhetin, ta votojmë propozimin e Rexhep Selimit. Ky buxhet nuk është i ri ashtu siç është qeveria e re. Janë mbi 300 milionë euro obligime”, tha Kurti, raporton KOHA.
Seanca e Kuvendit ka shkuar në pauzë dhjetë minutëshe. Kjo është bërë me kërkesë të Rexhep Selimit si propozues i mocionit për shmangie të procedurave, për te diskutuar me kryetarët e grupeve parlamentare rreth këtij mocioni.
“Po i kuptoj shqetësimet e opozitës por po e shoh te nevojshme të kërkoj një pauzë për një konsultë shtesë te gjithë shefat e grupeve parlamentare për ta diskutuar edhe një herë mocionin dhe pastaj vendimi ynë i përbashkët të jetë në shërbim të qytetarëve”, tha Selimi, raporton KOHA.
