Komuna e Podujevës, në janar të këtij viti, pati hapur tenderin për trajtimin e qenve endacakë, raporton Llapi.info.
Për këtë problematikë, Komuna e Podujevës pati planifikuar t’i shpenzonte 25 mijë euro.
Por, ky aktivitet, i cili ishte për qëllim të trajtimit të qenve endacakë, është anuluar. Kështu të paktën thuhet në faqen zyrtare të Komunës.
“Një dispozitë në Ligjin e Prokurimit Publik kërkon anulimin e aktivitetit të prokurimit”, thuhet në arsyetimin për anulimin e këtij aktiviteti.
Sipas të njëjtit njoftim, në këtë tender është vlerësuar se asnjë operator ekonomik nuk kishte qenë i përgjegjshëm.
Ndryshe, qytetarët e Podujevës janë në hall me llavat e qenve endacakë që sillen vërdallë rrugëve të qytetit. Ata kanë ‘pushtuar’ secilën rrugë, institucione arsimore, shëndetësore e parqe të qytetit.
Në mungesë të strehimit, qentë bredhin rrugëve. Qentë në shumicën e kohës gjenden pranë kontejnerëve apo afër hapësirave të ndërtesave banuese duke kërkuar ushqim e strehim. Në mungesë të ushqimit, shpeshherë ata dinë të bëhen edhe agresivë e që kjo gjë po paraqet në vazhdimësi problem për qytetarët llapjanë.
Nuk janë të pakta ankesat e qytetarëve drejtuar institucioneve për rrezikun që u shkaktohen nga këta qen, derisa edhe komuna tjera kanë planifikuar trajtimin e tyre./Llapi.info
VENDIMI I PLOTË PËR ANULIMIN E AKTIVITETIT
