Ish-ministrja e Drejtësisë, Albulena Haxhiu, LVV, ka reaguar ndaj vendimit të Qeverisë së Kosovës, për lejimin e organizimit të zgjedhjeve të Serbisë në Kosovë.
Haxhiu përmes një statusi në rrjetin social Facebook ka shkruar se lejimi i organizimit të zgjedhjeve të Serbisë në Kosovë është dorëzimi dhe gjunjëzimi i radhës karshi Serbisë.
Siç ka shkruar ajo, qeveria ilegale dhe pa mbështetje popullore, po e konsideron Kosovën si vend në të cilin Serbia ka hise.
“Qeveria ilegale dhe pa mbështetje popullore, po e konsideron Kosovën si vend në të cilin Serbia ka hise! Lejimi i organizimit të zgjedhjeve të Serbisë në Kosovë është dorëzimi dhe gjunjëzimi i radhës karshi Serbisë. Serbia po vazhdon cenimin e sovranitetit dhe integritetit territorial. Ky është agresion. Pazaret e kësaj Qeverie me Serbinë, kushedi se kur do të ndalen”, ka shkruar Haxhiu.
Tutje Haxhiu ka thënë se ish-Qeveria Kurti ia ktheu dinjitetin vendit me qeverisjen e saj.
“Qeveria Kurti, ia ktheu dinjitetin vendit prandaj ajo qeverisje duhet të kthehet. Angazhimi dhe përbashkimi kundër kësaj Qeverie është i domosdoshëm”, ka shkruar në Facebook, Haxhiu.
Autoritetet kosovare kanë lejuar që brenda territorit të Kosovës të lejohet procesi i votimit për zgjedhjet parlamentare të Serbisë.
