Në kuadër të “Javës së Diasporës” është hapur panairi i librit në Podujevë, i cili është organizim i përbashkët i Drejtorisë për Kulturë, Rini dhe Sport dhe shoqatës “PRO Cult”, njofton kumtesa, transmeton Llapi.info.

Në hapjen e panairit kanë marrë pjesë nënkryetarja e komunës, Marigona Lahu dhe drejtori për Kulturë, Rini dhe Sport, Pajtim Balaj, të cilët kanë vizituar dhe bashkëbiseduar me botuesit e librave që po marrin pjesë në këtë panair.

Panairi i Librit synon promovimin e leximit shqip me theks të veçantë tek të rinjtë shqiptarë që jetojnë në vende të ndryshme të botës, e gjatë kësaj kohe po qëndrojnë për pushime në Kosovë.

Panairi i Librit do të zgjasë tri ditë me radhë nga ora 09 deri në ora 21:00 në sheshin e qytetit.

Gjatë “Javës së Diasporës” do të ketë edhe një mori aktivitetesh të ndryshme të organizuara nga Komuna e Podujevës, me qëllim që bashkatdhetarëve tanë t’ju ofrohet program i pasur kulturor dhe sportiv./Llapi.info