Situata me furnizimin e serbëve në veri të Kosovës me produktet ushqimore bazë është ende shumë e vështirë, pasi Prishtina vazhdon të parandalojë dorëzimin e mallrave serbe në të gjitha mënyrat, tha sot i ashtuquajturi drejtori i zyrës për Kosovë në qeverinë serbe, Marko Gjuriq.
“Më së shumti do të doja të them se furnizimi i qytetarëve tanë në veri të Kosovës është normalizuar, por druaj se për shkak të këmbënguljes kokëfortë të Prishtinës për taksat e mallrave nga Serbia, situata nuk do të jetë normale edhe për një kohë. Prishtina vazhdon ta vështirësojë atë, por ne jemi duke ia arritur disi”, tha Gjuriqi.
Biznesmenët nga veriu i Kosovës, të cilët furnizohen me mallra nga Serbia, javën e kaluar, në marrëveshje me pronarët e dyqaneve, organizuan një protestë paralajmërimi dyditore duke i mbyllur të gjitha dyqanet ushqimore.
Prishtina zyrtare akuzoi Beogradin se dëshiron të inskenojë krizë humanitare duke mbyllur dyqanet. Ndërkohë, produktet ushqimore serbe përsëri u shfaqën në dyqanet në veri të Kosovës, dhe presidenti serb Aleksandar Vuçiq ka shfaqur shpresë se Serbia në ditët e ardhshme do të përmirësojë situatën me furnizime.
