Një ngjarje e rëndë ka ndodhur pasditen e djeshme rreth orës 18:00 në fshatin Stanovc të komunës së Vushtrrisë, ku një 27-vjeçar është plagosur me armë zjarri.
Sipas informacioneve zyrtare të Policisë së Kosovës, i dyshuari për plagosjen është babai i viktimës, i cili pas të shtënave është larguar nga vendi i ngjarjes dhe ndodhet ende në arrati. Viktima është dërguar menjëherë për trajtim mjekësor dhe, sipas autoriteteve shëndetësore, ndodhet jashtë rrezikut për jetë.
Hetuesit kanë gjetur katër gëzhoja në vendin e ngjarjes, ndërsa hetimet po zhvillohen nën udhëheqjen e prokurorit kompetent. Rasti është cilësuar si “Vrasje e rëndë në tentativë”.
Policia ka nisur një operacion për kapjen e të dyshuarit, ndërkohë që hetimet janë në vazhdim për të sqaruar motivet dhe rrethanat e këtij akti të rëndë.
