Një person nga Podujeva i shpallur në kërkim është arrestuar sot në Prishtinë, raporton Llapi.info.
I njëjti ka tentuar t’u ikë policëve, i cili më pas është arrestuar, nën dyshimin se ka ushtruar dhunë në familje. Kështu ka njoftuar Policia e Kosovës në një komunikatë për medie.
“Prishtinë, 25 gusht 2021 – Drejtoria Rajonale e Policisë Prishtinë, ka ndërmarrë të gjitha masat e nevojshme policore për të siguruar rendin dhe qetësinë publike në rajonin e Prishtinës, dhe kjo duke punuar me vendosmëri dhe përkushtim për kapjen e personave që dyshohen të jenë të implikuar në veprimtari kriminale, dokumentimin ligjor të veprimeve të tyre kriminale si dhe vënien e tyre para drejtësisë. Si rrjedhojë e këtyre angazhimeve, sot nga hetuesit policor të stacionit të Podujevës, në afërsi të Pallatit të Drejtësisë, përkundër tentativave për ikje, është arrestuar një person i dyshuar. Personi i dyshuar ka qenë në kërkim nga ana e policisë, për një rast të dhunës në familje që ka ndodhur me datën 21.08.2021, në fshatin Bervenik të Podujevës. I njëjti me rekomandim të prokurorit të shtetit është dërguar në qendrën e mbajtjes, për veprën dhunë në familje”, thuhet në komunikatë./Llapi.info
