Këtë të premte ka vazhduar diskutimi për gazin amerikan që raportohej se i është ofruar Kosovës. Në një përgjigje të Ambasada Amerikane në Prishtinë, ekskluzivisht për Gazetën Online Reporteri.net, thuhet se nuk ka asnjë projekt të lidhur me qeverinë amerikane në shqyrtim për të sjellë gazin amerikan në Kosovë.
“Nuk ka asnjë projekt në shqyrtim të lidhur me qeverinë amerikane për të sjellë gazin amerikan në Kosovë. Megjithatë, Qeveria e Kosovës dhe Korporata Financiare e Mijëvjeçarit po shqyrtojnë një projekt të propozuar si pjesë e një serie propozimesh për një kompakt të ri që do të ndihmonte Kosovën në lidhjen me një tubacion ekzistues të transmetimit të gazit natyror në Maqedoninë e Veriut. Shumica e financimit, megjithatë, do të vinte nga fondet e BERZH dhe WBIF. Diskutimet janë duke vazhduar nëse Qeveria e Kosovës do ta mbështesë këtë propozim”, tha zëdhënësi e Ambasadës së ShBA në Prishtinë, Eric Brassil, për Gazetën Online Reporteri.net.
Tutje në përgjigjen e Ambasadës Amerikane në Prishtinë sqarohet fokusi që do të mund të kishte projekti i tubacionit amerikan të gazit duke renditur 4 ndikime kryesore në ekonominë e Kosovës.
Në përgjigjen e zëdhënësit Brassil për Gazetën Online Reporteri.net thuhet se infrastruktura jo adekuate energjetike pengon zhvillimin e fuqishëm ekonomik të Kosovës duke përmendur kostot e furnizimit elektrik me qymyr, i cili sipas Ambasadës së ShBA në Prishtinë kufizon konkurrencën.
Ndërkaq projekti i diskutuar nga ana e Qeverisë së Kosovës dhe Korporatës Financiare të Mijëvjeçarit do të ndihmonte në tranzicionin drejt elektricitetit larg nga prodhimi me thëngjill.
“Projektet e propozuara fokusohen në zbutjen e shkaqeve rrënjësore të kufizimit të energjisë në Kosovë, ndërsa sigurojnë ndihmë plotësuese për sektorin e energjisë, si dhe mbështetjen e një tranzicioni të drejtë, larg nga prodhimi i thëngjillit me intensitet të lartë të karbonit. Megjithëse nuk është një kufizim detyrues, mungesa e pjesëmarrjes së grave në ekonomi trajtohet gjithashtu në këto projekte dhe është kritike për aftësinë e grave për të përfituar nga një Marrëveshje MCC”, thotë sqarimi i zëdhënësit Brassil për Gazetën Online Reporteri.net.
Sot gjatë ditës Ministrja e Ekonomisë, Artane Rizvanolli, ka thënë se Qeveria e Kosovës nuk mund të vendosë për gazsjellësin pa e ditur koston totale.
