Sot, kryetari i Lëvizjes Vetëvendosje, Albin Kurti, bëri homazhe tek varri i legjendës së futbollit të Kosovës, Fadil Vokrri në dy vjetorin e vdekjes së tij, shkruan Llapi.info.
Këtë vizitë Kurti e bëri së bashku me deputetët e kësaj partie që vijnë nga qyteti i Podujevës, Shpejtim Bulliqi, Saranda Bogujevci e Fitim Haziri.
“Fitoret e Prishtinës ishin të lidhura me emrin e tij. Vokrri ishte arsyeja e fitores sepse kur topi ishte në këmbën e tij ai e ushtonte fushën. Tregojnë bashkëlojtarët e tij me gjysëm shaka: “kur ndeshja ishte sfilitëse dhe donim të pushonim ia kalonim topin Fadilit”. Kështu ishte edhe në Federatë. Punoi shumë e pa u lodhur për pasionin e vajzave e djemëve tanë”, tha Kurti në rrjetin social Facebook.
Pas vizitës tek varri i legjendës Fadil Vokrri, Kurti vizitoi edhe qytetin e Podujevës dhe pikat se ku janë duke u mbledhur nënshkrimet për peticionin “Duam Zgjedhje”, peticion ky i cili pritet të dërgohet në instanca ndërkombëtare nga LVV.
Ndërsa, nga Lëvizja Vetëvendosje thonë se për më pak se një javë, thirrjes së peticionit “DUAM ZGJEDHJE” u janë përgjigjur rreth 150 mijë qytetarë./Llapi.info
