Presidenti i SHBA-së, Donald Trump, ka shprehur pakënaqësi ndaj aleatëve të NATO-s gjatë një takimi të tensionuar me Sekretarin e Përgjithshëm Mark Rutte, duke lënë të kuptohet se po shqyrton masa hakmarrëse për mungesën e mbështetjes në lidhje me luftën në Iran.
Burimet po ashtu thonë se ai la të kuptohet se pret hapa konkretë nga aleatët për rihapjen e Ngushticës së Hormuzit, një pikë strategjike për transportin global të naftës, shkruan Politico.
Megjithatë, një zyrtar i Shtëpisë së Bardhë mohoi se Trump ka paraqitur kërkesa ndaj NATO-s, duke thënë se ai nuk ka pritshmëri aktuale nga aleanca.
Sipas tij, NATO “nuk e kaloi testin”, por SHBA nuk ka bërë kërkesa zyrtare, ndërsa vendet evropiane përfitojnë më shumë nga lundrimi në Hormuz sesa SHBA-ja.
Pas takimit, Trump kritikoi publikisht aleatët e NATO-s, ndërsa zyrtarë të aleancës e përshkruan bisedën si të hapur dhe konstruktive, pavarësisht tensioneve.
Ndërkohë, diskutimet brenda NATO-s për veprime konkrete në lidhje me Ngushticën e Hormuzit mbeten në fazë të hershme, ndërsa aleatët theksojnë se çdo veprim do të varet nga përfundimi i konfliktit në rajon.
