H.ZH., 58-vjeçare nga Podujeva ka ndërruar jetë si pasojë e plagëve të marra nga të shtënat me armë, raporton Llapi.info.
Ajo ka ndërruar jetë të hënën në QKUK, ndërkohë që e njëjta ishte plagosur aksidentalisht nga një familjar i saj, M.ZH 23-vjeçar.
Ndërsa sot Gjykata Themelore në Prishtinë, duke aprovuar kërkesën e Prokurorisë Themelore, ka vendosur që të pandehurit t’i shqiptohet masa prej një muaji paraburgim.
“Gjykata Themelore në Prishtinë ka aprovuar kërkesën e Prokurorisë Themelore në Prishtinë për caktimin e masës së paraburgimit kundër të pandehurit M.ZH për shkak të dyshimit të bazuar se ka kryer veprën penale Vrasje nga pakujdesia nga neni 175 të Kodit Penal të Republikës së Kosovës. Të pandehurit M.ZH. gjykata i ka caktuar masën e paraburgimit në kohëzgjatje prej 1 (një) muaji, pasi që e njëjta ka konstatuar se janë përmbushur kriteret në bazë të nenit 187 par.1 nën par.1.1 dhe nën par.1.2 pika 1.2.1, 1.2.2 dhe 1.2.3 të KPPRK-së”, thuhet në njoftim.
“Gjykata ka vlerësuar se masa e paraburgimit është masë adekuate për zhvillimin e papenguar në këtë çështje penale, pasi që ekzistojnë rrethanat që tregojnë rrezikun se po të gjendet i pandehuri M.ZH.. në liri ekziston rreziku i ikjes së tij, po ashtu mund ti asgjësojë, fsheh, ndryshoj apo falsifikoj provat e veprës penale duke ndikuar në dëshmitarë.I pandehuri M.ZH. dyshohet se me datë 20.12.2020 rreth orës 23.30 në Podujevë, nga pakujdesia kishte shkrepur armën e markës “Magnum” dhe në atë moment kishte pësuar lëndime anëtarja e familjes – tani e ndjera SH.ZH., e cila me datë 21.12.2020 nga plagët e marra kishte ndërruar jetë në QKUK”, thuhet tutje.
Sipas njoftimi, palët kanë të drejtë ankese kundër këtij vendimi në Gjykatën e Apelit të Kosovës./Llapi.info
