Ministri i Bujqësisë, Pylltarisë dhe Zhvillimit Rural, Besian Mustafa i shoqëruar nga nënkryetari i Komunës së Podujevës, Nexhmi Rudari kanë vizituar kultivuesit e pemëve të imta dhe blegtorët e kësaj komune, për të parë nga afër ecurinë e aktiviteteve bujqësore të këtyre fermerëve, shkruan Llapi.info.
Me rastin e kësaj vizite, Mustafa ka theksuar se fermerët llapjanë do ta kenë mbështetjen e tij.
“Në programet mbështetëse përmes granteve investive dhe subvencioneve do ta përkrahim prodhimtarinë bujqësore dhe blegtorale në këtë komunë, duke ndikuar kështu në rritjen e sasisë dhe cilësisë së këtyre prodhimeve”, citohet të ketë thënë Mustafa, sipas komunikatës së Ministrisë së Bujqësisë.
Ndërkaq, nënkryetari i Podujevës, Nexhmi Rudari falënderoi Ministrin Mustafa për mbështetjen e tij të vazhdueshme për prodhuesit bujqësorë të këtij rajoni dhe theksoi se vetëm përmes kësaj përkrahje këta prodhues mund t’i tejkalojnë edhe sfidat me të cilat ata janë përballur gjatë muajve të fundit./Llapi.info
