Presidenti turk, Recep Tayyip Erdogan, u bëri thirrje vendeve islame që të kontribuojnë për shërimin sa më të shpejt të plagëve nga tërmeti në Shqipëri.
Erdogan në fjalimin e tij të mbajtur në Konferencën e Investimeve të Sektorit Publik dhe Privat të Bashkëpunimit Islam të Nivelit të Lartë të mbajtur në Stamboll tërhoqi vëmendjen që 21 për qind e popullatës së vendeve të Organizatës së Bashkëpunimit Islam, gjegjësisht 350 milionë njerëz, përpiqen të mbijetojnë në kushte të skamjes ekstreme.
“Hendeku i të ardhurave midis vendit më të pasur islamik dhe i atij më të varfër është mbi 200 herë. Nëse myslimanët japin zekatin [që është njëra prej 5 kushteve të Islamit me të cilin myslimanët detyrohet të japin 1/40 pjesë të mallrave apo të parave çdo vit], atëherë në vendet islame nuk do të mbetet njeri i varfër”, tha Erdogan.
Erdogan theksoi se, “është detyra jonë kryesore të shqetësohemi për vëllezërit dhe motrat tanë kudo që janë në botë”, ndërsa shtoi se ai ka urdhëruar ministrin e Mjedisit dhe Urbanizimit për të filluar me punime për ndërtimin e 500 banesave në Shqipëri, e cila më 26 nëntor u trondit nga një tërmet i fuqisë 6.4 ballë.
Ai deklaroi se kushtet financiare dhe historike të domosdoshme për rritjen ekonomike dhe mirëqenien e vendeve islamike janë shumë të favorshme dhe tha se, “prej jush kërkoj që ta mbështesni me të gjitha mjetet e mundshme Shqipërinë që t’i shëroj shpejt plagët nga tërmeti”.
