Italia ka arritur ta mposht Belgjikën në çerekfinale të Euro 2020 me rezultat 2-1, duke fituar një vend në gjysmëfinale.

Një ndeshje shumë e bukur mes këtyre dy skuadrave ku nuk kanë munguar rastet, sidomos në pjesën e parë.

Italia shënoi fillimisht me Leonardo Bonuccin në minutën e 13-të, por goli u anulua për pozitë jashtëloje pasi u shikua në VAR.

Belgjika rrezikoi dy herë, ku Gio Donnarumma bëri dy pritje të mëdha ndaj Romelu Lukakut dhe Kevin De Bruynes.

Por momenti i golit erdhi në minutën e 31-të, ku një gabim në mbrojtjen e belgëve, nuk u fal nga italianët.

Vermalen humbi një top, i cili u mor nga Marco Verratti, që asistoi te Nicolo Barella, i cili lëvizi bukur në zonë dhe dënoi portierin Thibaut Courtois (1-0).

Por sulmet e Italisë nuk u ndalën, duke gjetur sërish golin në minutën e 44-të.

Lorenzo Insigne shënoi gol të bukur me një goditje fantastike nga jashtë zonës për 2-0.

Por Belgjika shpejt u kthye në lojë, pasi fitoi penalti, ku Doku u rrëzua në zonë nga Di Lorenzo.

Nga pika e bardhë ishte i saktë Romelu Lukaku që shënoi për 2-1.

Me të filluar pjesa e dytë Belgjika, kishte një rast të mirë me Romelu Lukakun, por topin nga vija e portës e shpëtoi Leonardo Spinazola.

Për Italinë ishte pikërisht Spiazola që kishte rast të mirë, por gjuajti jashtë.

Belgjika kishte edhe një rast të mirë me Lukakun, ku një harkim të bukur në zonë, nuk arriti të godas topin për ta dërguar drejt portës.

Jeremy Doku ishte ai që rrezikoi dy herë, por goditja e tij pas disa kalimeve, përfundoi pak mbi portë.

Belgjika provoi deri në fund, por nuk arriti ta barazojë rezultatin, duke bërë që Italia ta fitojë një vend në gjysmëfinale.