Federata e Sindikatave të Shëndetësisë, ka kërkuar nga kryeministri i Kosovës, Albin Kurti që shtesat në paga për punëtorët e shëndetësisë të vazhdohen për të gjithë punëtorët shëndetësor deri në përfundim të pandemisë.

Përmes një kërkese e cila është ndarë edhe me medie, FSSHK ka bërë të ditur se këtë kërkesë janë detyruar ta ndajnë publikisht pas dhjetëra kërkesave të dërguara për të cilat nuk kanë marrë përgjigje.

“Kërkojmë nga Ju bazuar në Ligjin nr.07/L-006 për parandalimin dhe luftimin e Pandemisë COVID-19 në territorin e Republikës së Kosovës që të ju vazhdon shtesat në pagë për punëtorët shëndetësorë deri në fund të Pandemisë apo aprovimit të Ligjit të Pagave”, thuhet në kërkesën e tyre.

Siç shkruajnë ata, kërkesa është bërë publike pasi nuk kanë marrë përgjigje as nga Presidentja, as nga ministrat e as nga Komisioni Parlamentar në kërkesat që kanë bërë më herët.

“Jemi të detyruar të bëjmë publike këtë kërkesë pas dhjetëra shkresave që ja kemi adresuar: Presidentes të Republikës së Kosovës, Zyrës së Kryeministrit, Ministrave përkatës, Komisionit Parlamentar për Shëndetësi dhe Deputetëve që përfaqësojnë komunitetin shëndetësor në Parlamentin e Republikës së Kosovës, por nuk kemi marrë përgjigje”, thuhet në këtë kërkesë.

Ata shprehen se kryeministri i Kosovës, ose duhet të zbatojë ligjin në fjalë, ose ta shpallë pandeminë të përfunduar.

“I nderuar Zoti Kryeministër i keni dy rrugë o ta zbatoni këtë ligj dhe të paguan shtesat konform tij, ose ta anuloni këtë ligj dhe ta shpallni Pandeminë e përfunduar në Kosovë”, thuhet në kërkesë.

Po ashtu, ata kanë shtuar, “Zoti Kryeministër po ju rikujtojmë se mbi gjysma e punëtorëve shëndetësor kanë qenë të infektuar lehtë apo rënd me Covid -19 dhe kemi dhjetëra vdekje të kolegëve tanë, andaj konsiderojmë se të paktën të merrni një vendim i cili mbron integritetin dhe dinjitetin e punëtorëve shëndetësor të cilit kanë kaluar nëpër sfida të rënda për pasojat e se cilës ende nuk dihen se cilat do të jenë dinë. Zoti Kryeministër është koha të reflektoni”, thuhet në kërkesë.