Ish-diplomati kosovar, Anton Berisha, ka komentuar paraqitjen para mediave të kryeministrit Albin Kurti me presidentin francez, Emmanuel Macron, para takimit të tyre sot në Pallatin Elysee në Paris.
Berisha në “Debat Plus” thotë se është e vërtetë se Kosova ka qenë e privilegjuar që kryeministri i saj është pritur në Pallatin Elyse.
“Edhe kryeministri paraprak Avdullah Hoti është pritur nga presidenti Macron dhe kjo vazhdimësi është në të mirë të Kosovës”, tha ai, përcjell Telegrafi.
Ish-zëvendësministri i Jashtme ka përshëndetur paraqitjen e Kurtit pasi sipas tij Kurti tashmë ka ulur tonet dhe po flet me falënderime.
“Kryeministri dalëngadalë po zbret në realitet. Ka deklarata të matura dhe me tone falënderuese”.
Megjithatë Berisha ka një vërejtje për Kurtin në këtë paraqitje.
“Por Kurti ende ka mbetur në atë se ka një realitet të ri në Evropë (pas ardhjes së Biden në Shtëpinë e Bardhë). Nuk ka realitet të ri në Bashkimin Evropian. Është po ai Macron që ishte (edhe para ardhjes së Biden)”, deklaroi Berisha.
