Kryetari i Komunës së Podujevës, Shpejtim Bulliqi, ka reaguar pas sulmit ndaj imamit të fshatit Lupç të Podujevës, Zeqir Berishës, shkruan Llapi.info.

Ai e ka dënuar ashpër këtë sulm, derisa ka kërkuar nga organet e rendit që të ndërmarrin masa ligjore dhe autorët e sulmit të marrin dënimin e merituar.

Ai e ka përshkruar imamin si një person që shquhet për humanitet dhe tolerancë njerëzore.

“Jemi shqetësuar shumë me lajmin për sulmin fizik ndaj imamit Zeqir Berisha, i cili si person shquhet për humanitetin, kulturën dhe tolerancën njerëzore. Duke e dënuar ashpër sulmin ndaj hoxhës në vendin e tij të punës, kërkoj nga organet e rendit të ndërmarrin masat ligjore dhe autorët e sulmit të marrin dënimin e merituar. Hoxhës Zeqir Berisha i uroj shërim të shpejtë!”, ka shkruar Bulliqi.

Ndryshe, për sulmin ndaj imamit janë arrestuar tre të dyshuar dhe ndaj tyre është inicuar rast për “vrasje në tentativë”.