Lëvizja Vetëvendosje i ka besuar Mefail Bajqinovcit detyrën e anëtarit të Komisionit për Mbikëqyrjen e Punës së Agjencisë së Kosovës, AKI.
Lajmin e ka konfirmuar vetë deputeti me një status në Facebook. Bajqinovci ka premtuar se do të punojë më tërë kapacitetin e tij për të mbështetur procesin e reformave të sigurisë në vend.
“Dua të shprehë falenderimin tim ndaj Grupit Parlamentar të Lëvizjes Vetëvendosje, që më ka besuar detyrën e anëtarit të Komisionit për Mbikëqyrjen e Punës së Agjencisë së Kosovës për Inteligjencë-AKI
Institucionet e sigurisë kanë qenë cak i kontrollit partiak, të cilat, janë keqpërdorur për interesa personale e grupore. Si rezultat, ato nuk kanë qenë në gjendje sa duhet t’i kryejnë detyrat e tyre në shërbim të rendit, ligjit dhe sigurisë së Republikës së Kosovës.
Me tërë kapacitetin tim, do të punojë brenda detyrave kushtetuese të mia, që ta mbështesim procesin e reformave nëpër mekanizmat e sigurisë në vend.
Me nder e përkushtim kombëtar, qytetar e moral do të angazhohem që mbikqyrja parlamentare e AKI’së të arrijë qëllimin përfundimtar në shërbim të ngritjes së këtij institucioni, në nivelin e duhur ashtu sikurse e kërkon Kushtetuta e vendit.
Poashtu edhe në komisionet të cilat kam njohuri do t’a jap kontributin tim në cilësinë e deputetit” shkruan Bajqinovci në njoftim.
