Ujdi mes veteranëve e Qeverisë

Frytdhënës dhe konstruktiv u quajt takimi i sotëm mes përfaqësuesve të organizatave të dala nga lufta dhe Qeverisë së Kosovës.

Kryeministri Isa Mustafa, bashkë me zëvendësin e tij Hashim Thaçin dhe ministrin për Punë dhe Mirëqenies Sociale Arban Abrashi të cilët takuan përfaqësuesit e organizatës së veteranëve të luftës së UÇK-së, si dhe përfaqësuesit e shoqatës së invalidëve dhe familjeve të dëshmorëve të UÇK-së, thanë se treguan përkushtimin e institucioneve të Kosovës për t’iu zgjidhur hallet që kanë këta të fundit.

Mustafa tha në konferencë për media se Qeveria ka bërë përpjekje që të sigurojë fondet për të përballuar pensionet për veteranët.

“Natyrisht se numri i veteranëve është i tillë që ne duhet të mundohemi që të plotësojmë të gjitha kërkesat e tyre sipas vendimeve të cilat janë marrë, të plotësojmë edhe në pikëpamje kohore dhe të kujdesemi edhe për invalidë të luftës të UÇK-së dhe të gjitha këto do t’i koordinojmë bashkërisht në një proces të punës së përbashkët drejtpërdrejt me qeverinë ose me ministritë përkatëse”, ka thënë Mustafa.

Përfaqësuesi i familjeve të veteranëve të UÇK-së, Smajl Elezi, tha se takimi me Qeverinë ishte konstruktiv dhe se do presin veprimet e Qeverisë.

“Mendoj që kemi gjet mirëkuptim dhe do e gjejmë një rrugë që do kalojmë problemet që i kanë veteranet dhe hallet e tjera të veteranëve. Çështja e pagesave dhe besoj që jemi dakorduar që prej kohës kur kanë aplikuar veteranët Qeveria të bëjë pagesën për ta”, tha Elezi