Milovan Drecun, Kryetari i të ashtuquajturit Komiteti Parlamentar për Kosovën në Kuvendin e Serbisë, deklaroi se Kosova po e kompleton ushtrinë e saj me ndihmën e plotë të NATO-s.

Ai tha se NATO si organizatë duhet të ketë pozicion neutral ndaj Kosovës sepse disa vende anëtare të saj nuk e njohin Kosovë, megjithatë sipas tij s’ka dyshim se NATO me përkrahje të plotë po ndihmon në transformimin e FSK-së për tu bërër ushtri, shkruan Tanjug.

Sipas tij, transformimi i FSK-së po hyn në vitin e tretë por që ajo do të duhej të ishte një organizatë civile dhe jo një formacion ushatarak.

Ai tha se plani i FSK-së është deri në vitin 2027 të bëhet ushtri e rregullt me 5 mijë ushtarë aktivë dhe 3 mijë rezervistë.

“Ajo që është e re dhe më pak e njohur për publikun është se një plan i shërbimit të detyrueshëm ushtarak është hartuar për burrat e moshës 19 deri 34 vjeç dhe i njëjti plan do të jetë vullnetar për gratë. Ata presin që në vitin 2028, kur do të futet shërbimi i detyrueshëm ushtarak, potenciali i tyre i rekrutimit është 180,000 njerëz “, u shpreh Dreçun.