Nënkryetari i Komunës së Novobërdës, Bajrush Ymeri në një prononcim për Telegrafin ka thënë se dy minatorët kanë humbur jetën si pasojë e shembjes së dheut në galerinë e pestë në minierë.
Ymeri tha se bashkë me kryetarin e Novobërdës, zjarrfikësit dhe ambulancën kanë arritur në vendin e ngjarjes.
Ai po ashtu shtoi se minatorët e tjerë kanë arritur të dalin dhe janë shëndosh e mirë.
“Pas orës 10:00, sipas informatave që morëm, menjëherë u nisëm bashkë me kryetarin e komunës. Ka ndodhur një tragjedi këtu në minierën e Artanës. Është shembur dheu në galerinë e pestë dhe dy minatorë kanë humbur jetën. Kana arritur, policia, zjarrfikësit dhe ambulanca”, ka thënë Ymeri.
Ai tha se janë duke i pritur ushtarët e FSK-së, për t’i nxjerr trupat nga miniera.
“Tash po i presim ushtarët e FSK-së që t’i nxjerrin trupat e dy minatorëve, si dhe prokurorin për zbardhjen e rastit”, ka thënë ndër të tjera nënkryetari i Novobërdës, Bajrush Ymeri.
Telegrafi mëson se dy minatorët që kanë pësuar në minierën e Artanës, njëri është nga komuna e Lipjanit dhe tjetri me banim në Hajvali të Prishtinës.
Ndryshe, edhe kryetari i Sindikatës së Punëtorëve të Trepçës, Shyqyri Sadiku ka konfirmuar për Telegrafin se një inxhinier dhe një minator kanë humbur jetën si pasojë e shembjes së dheut.
