Llapi ka pësuar humbjen e radhës në këtë edicion, derisa sot është mposhtur si mysafir nga Gjilani me rezultat 2-0, raporton Llapi.info.
Pas disa përpjekjeve të mysafirëve në fillim të ndeshjes, erdhi ndëshkimi nga vendasit.
Fiton Hajdari e zhbllokoi rezultatin (26’) duke e paraboluar portierin vizitor, Stefan Hoffman, për epërsinë e gjilanasve.
Me epërsi minimale të vendasve përfundoi pjesa e parë, ndërsa edhe në gjysmën e dytë, të dyja skuadrat tentuan të shënonin.
Ndërsa ishin vendasit ata që e realizuan edhe golin e dytë. Ardit Hila pranoi një asistim të Gerhard Prognit në zonë dhe u tregua i saktë (75’).
Me këtë fitore, Gjilani është ngritur në kuotën e 20 pikëve, gjashtë më pak se lideri Ballkani dhe dy më pak se rivali i qytetit, Drita, që ndodhet në vend të dytë.
Llapi mbetet në fund të tabelës me vetëm pesë pikë të arkëtuara pas 11 xhirosh.
Në xhiron e radhës, Llapi pret Trepçën 89′, derisa Gjilani i shkon Ballkanit./Llapi.info