Derisa po i afrohemi fundit të kampionatit spanjoll, tashmë kanë nisur kalkulimet e ndryshme se si dhe kur mund të shpallet Real Madridi kampion në sezonin 2019/2020.
Klubi kryeqytetas është katër pikë përpara rivalit të përbetuar, Barcelona, kur kanë mbetur edhe katër xhiro deri në fund.
Më poshtë, jua sjellim disa kombinime në rezultate dhe kohë se kur mund ta festojë titullin ekipi i Zinedine Zidane, gjithmonë duke e llogaritur se ka fatin në duart e veta.
Ndeshjet e mbetura të Real Madridit dhe Barcelonës (Foto: AS)
Nëse Los Blancos triumfojnë ndaj Deportivo Alaves të premten dhe Blaugranët sigurojnë vetëm një pikë në ndeshjet ndaj Espanyolit (në mesjavë) dhe Real Valladolidit (të shtunën), atëherë Mbretërit do ta sigurojnë titullin e 34 në fundjavën që vjen.
Data e radhës është 13 korriku (e hënë), kur Merengues vizitojnë Granadan. Nëse lideri regjistron fitore edhe ndaj Alavesit edhe ndaj Granadas, Barca do ta ketë të pamundur që ta arrijë rivalin në rast se dështon ta mposhtë qoftë Espanyolin qoftë Valladolidin. Nëse katalunasit barazojnë në të dyja ato takime, atëherë Madridit do t’i mjaftojë një fitore dhe një barazim (katër pikë) ndaj Alavesit dhe Granadas.
Më pastaj, Reali do të luajë kundër Villarrealit të enjten (16 korrik). Pavarësisht rezultateve të Blaugranëve, Mbretërit janë të vetëdijshëm se nëse fitojnë ndaj Alavesit dhe Granadas, si edhe nëse i marrin tri pikë ndaj Nëndetëses së Verdhë, atëherë do të shpallen kampionë.
Kur dhe si mund të shpallet Real Madridi kampion i La Ligas për sezonin 2019/2020:
Të shtunën, më 11 korrik
Reali fiton ndaj Alavesit.
Barca merr vetëm një pikë ndaj Espanyolit dhe Valladolidit.
Të hënën, më 13 korrik
Reali fiton ndaj Alavesit dhe Granadas.
Barca dështon ta fitojë njërën prej dy ndeshjeve (ndaj Espanyolit apo Valladolidit).
Ose
Reali merr katër pikë ndaj Alavesit dhe Granadas.
Barca barazon në të dyja ndeshjet (ndaj Espanyolit dhe Valladolidit).
Të enjten, më 16 korrik
Barcelona nuk lëshon asnjë pikë.
Real Madridi i fiton tri ndeshjet e radhës.
