Këshilli për Mbrojtjen e të Drejtave dhe Lirive të Njeriut, konsideron se profesorët e Universitetit të Prishtinës dhe universiteteve tjera publike nuk kanë asnjë arsye për të mbajtur grevë.

Sipas këtij këshilli, këto universitetet të cilat janë ‘të formuara gjatë fushatave elektorale’ nuk kanë asnjë arsye të vetme për grevë, si reagim i skajshëm i pakënaqësisë sepse krahasuar me universitetet publike të rajonit, të ardhurat i kanë shumë të larta kurse përgjegjësinë e kanë minimale.

“Përveç se mungojnë në ligjërata dhe se si suflerë i dërgojnë asistentët e tyre , tipari kryesor dallues i shumicës së tyre është flirtimi dhe bashkëjetesa me strukturat politike të pushtetit , pavarësisht se cila apo cilat parti janë në pushtet. “ Nobelistët “ e Universitetit të Prishtinës , jo rrallë herë kanë qenë supermen të vërtetë duke punuar në , deri shtatë ( 7 ) vende pune!”, thuhet në reagimin e KMDLNJ-së.

Ky këshill thekson se i janë drejtuar prindër që për shkak të grevës në çerdhet publike, janë detyruar t’i dërgojnë fëmijët e tyre në çerdhet private dhe për këtë detyrohen të paguajnë mjete shtesë për faktin se ose duhet të paguajnë, ose duhet të mos shkojnë në punë.

“Për këtë arsye KMDLNj ka kërkuar dhe kërkon të mos paguajnë për shërbime që nuk u ofrohen , përkatësisht të mos paguajnë për çerdhe publike për aq kohë sa atë refuzojnë të ofrojnë shërbime . Dhe, nëse çerdhet kërkojnë kompensim për shërbimet që nuk i kanë ofruar dhe për këtë përdorin kërcënimin se do t’i largojnë këta fëmijë nga çerdhja , prindërit duhet të bëjnë padi te organet përkatëse”, thonë në KMDLNJ.