Që nga janari e deri në muajin dhjetor të këtij viti, në Repartin e Leukemisë dhe Onkologjisë në Klinikën e Pediatrisë në QKUK, rreth 38 raste të reja të fëmijëve janë paraqitur me sëmundje malinje. Ndërsa katër fëmijë gjatë këtij viti kanë humbur betejën me sëmundjen e kancerit e leukemisë. Këto të dhëna i kanë bërë të ditura për Express, zyrtarë nga Reparti i Hemato-Onkologjisë së QKUK-së

“Vlerësoje jetën dhe qëndroji asaj sepse ju jeni duke e jetuar këtë jetë”, ky është mesazhi i cili i bie në sy secilit pacient e vizitor në repartin e Hemato-Onkologjisë në Klinikën e Pediatrisë së QKUK-së. Këtë mesazh e kishte shkruar një vajzë e mitur e cila kishte vuajtur nga leukemia e që fatkeqësisht e ka humbur betejën me këtë sëmundje.

Dëshmore Kelmendi, vetëm 15 vjeçe, para disa vitesh ishe diagnostikuar me sëmundje malinje. Por me forcë dhe vullnet për çdo ditë e kishte luftuar sëmundjen e leukemisë. Fatkeqësisht, betejën me këtë sëmundje, ajo e humbi para disa viteve.

Por, ajo do të mbahet mend gjithmonë. Fjalët e saj janë të gdhendura në murin e pavijonit të Hemato-onkologjisë në Klinikën e Pediatrisë në QKUK.

Në dhomat gjatë këtij korridori gjenden të shtrirë edhe dhjetëra fëmijë të tjerë që fatin e jetës së tyre ua kanë lënë në duar mjekëve tanë.

Sipas doktorëve të këtij reparti, në Repartin e Hematologjisë, Leukemisë dhe Onkologjisë në Klinikën e Pediatrisë në QKUK, gjatë njëmbëdhjetë muajve të parë të këtij viti, me sëmundje malinje janë diagnostikuar 38 raste të reja të fëmijëve që janë prekur me sëmundje malinje.

Këtë fakt e ka dhënë për Gazetën Express, drejtoresha në këtë repart, Violeta Grajqevci. Ajo ka thënë se disa nga këto raste janë referuar për trajtim jashtë vendit ngase në Kosovë nuk ka aparatura e as medikamente adekuate për trajtimin e këtyre sëmundjeve.

“Gjatë këtij viti në Repartin e Hemato-Onkologjisë janë paraqitur 38 raste të reja me sëmundje malinje. Shumica e rasteve janë trajtuar në repartin tonë por ka edhe raste që janë udhëzuar për trajtim jashtë vendit”, ka deklaruar për Express Grajqevci.

Ndërkohë, për fat të keq, vetëm brenda këtij viti, katër fëmijë kosovarë nuk kanë mundur ta fitojnë betejën me sëmundjen e kancerit.

“Sa u përket rasteve që nuk kanë mbijetuar janë 4 raste”, thotë drejtoresha e repartit të Hemato-Onkologjisë në QKUK.

Nga 50 deri në 55 raste që paraqiten në këtë klinikë, rreth 25 prej tyre janë me leukemi.

E megjithëkëtë, gjatë vitit të kaluar janë paraqitur 51 raste të reja.

Ndryshe, mbi 4 mijë persona që nga viti 2017 e deri më tani vlerësohet se janë prekur me kancer në Kosovë. Shkaktarët e kësaj sëmundjeje thuhet se janë të ndryshëm, derisa kërkohet që qytetarët të ushqehen shëndetshëm e të bëjnë aktivitete fizike.

Nga hulumtimet që janë bërë deri tani thuhet se në botë janë 14 milionë raste të reja në vit me kancer, derisa parashihet që deri në vitin 2030 numri i rasteve me kancer të arrijë shifrën prej 21.7 milionëve.