Kryetari i Podujevës Agim Veliu po vazhdon ta keqpërdorë pozitën e tij si kryetar komune duke e shfrytëzuar veturën zyrtare edhe për udhëtime jashtë vendit.
Kësaj radhe, kandidati i VV-së në Podujevë Ajet Potera e ka kapur Veliun “mat” duke u kthyer nga Shqipëria për në Kosovë me veturë zyrtare.
Potera, i cili do ta ketë kundërkandidat nga LDK-ja kryetarin aktual të Komunës së Podujevës, ka thënë se të martën Agim Veliu është parë me veturë zyrtare në kufirin Kosovë-Shqipëri.
Kandidati i VV-së për kryetar të Komunës së Podujevës ka thënë se “dëshiron të besojë që kryetari i Komunës së Podujevës është në udhëtim zyrtar”, përndryshe, siç ka thënë ai, “është keqpërdorim i pozitës zyrtare”.
“Në ditë të punës me 29.08.2017 me veturë zyrtare në ora 18:30 në kufirin Kosovë – Shqipëri !
Po duam të besojmë se Kryetari i Komunës së Podujevës është në udhëtim zyrtar, për të mirën e qytetarëve Llapjanë, për ndryshe është keqpërdorim i pozitës dhe veturës zyrtare?”, ka shkruar Potera.
Ajet Potera u bashkua me Lëvizjen Vetëvendosje gjatë këtij viti, derisa u kandidua për kryetar të Podujevës pasi mori besimin e degës së partisë në këtë komunë.
