Gjermania ka regjistruar të premten numrin më të madh të infektuarve të ri me COVID-19 që nga fillimi i majit. Shifrat e rasteve të së premtes janë publikuar të shtunën nga Instituti Robert Koch (RKI), shkruan CNN.

Në Gjermani janë regjistruar 955 raste të reja me koronavirus. Kjo është shifra më e lartë që nga 9 maji.

Pandemia është vënë kryesisht në kontroll në Gjermani, por Qeveria ka paralajmëruar për përhapjet e reja në javët e fundit.

Instituti Robert Koch ka thënë se zbutja e masave e po ashtu edhe rikthimi i qytetarëve nga vendet me rrezikshmëri të lartë, janë fajtorë për këtë numër në rritje të rasteve.

“Numri total prej 955 të infektuarve është alarmues. Rreziqet kryesore duhet të përmenden që të parandalohen përhapjet e reja”, ka shkruar në Twitter, ministri i Gjermanisë për Ekonomi, Peter Altamaier.

Duke filluar nga sot, çdo qytetar që futet në Gjermani do të ketë mundësinë të bëjë një testim falas për koronavirus brenda 72 orëve nga ardhja, sipas direktivave të reja të ministrisë së Shëndetësisë së Gjermanisë.