Lajme nga Shqipëria

Policia e Patosit vuri në pranga 2 vëllezër pasi akuzohen se kanë ushtruar dhunë fizike ndaj vjehrrit të motrës së tyre.

Specialistët për Hetimin e Krimeve në Komisariatin e Policisë Patos, arrestuan në flagrancë shtetasit:

1.Emiljano Zyka, 29 vjeç, banues në lagjen “Sheq i Vogël” Fier.

2.Erildo Zyka, 25 vjeç, banues në lagjen “Sheq i Vogël” Fier.

Arrestimi i këtyre shtetasve u bë pasi në datën 08.06.2017, kanë ushtruar dhunë fizike ndaj vjehrrit të motrës së tyre shtetasit J.S, 62 vjeç, banues në Patos, duke i shkaktuar dëmtime në fytyrë dhe trup.

Materialet i kaluan Prokurorisë pranë Gjykatës së Shkallës së Parë Fier për veprën penale “Dhunë në familje” parashikuar nga Neni 130/a/1 e 25 i Kodit Penal.

Kryetari i Lëvizjes për Shqipëri të Bashkuar, Tahir Veliu, dhe dy bashkëpunëtorët e tij – Alban Mulaj dhe Burim Veliu, mbrëmë, më 6 qershor 2017, në ora 21:00 në pikën kufitare të Morinës janë arrestuar nga Policia e Shqipërisë dhe po mbahen nën arrest, bën të ditur ina.

“Lëvizja për Shqipëri të Bashkuar reagon ashpër ndaj ndalesave të vazhdueshme të kryetarit të LSHB-së dhe aktivistëve të tjerë. Lëvizja për Shqipëri të Bashkuar nuk njeh kufijtë e imponuar dhe angazhohet për shuarjen e kufijve që ndajnë shqiptarët”, thuhet në reagimin e LBSH-së pas këtij rasti.

Foto ilustrim

Qendra Monitoruese Europiane për Drogën dhe Varësinë ndaj Drogës publikoi të martën në Bruksel “Raporti mbi Drogën Europiane 2017”, duke vlerësuar se ka një rritje të trafikut nga vendet e Ballkanit, mes të cilave dallohet Shqipëria.

“Raportet e fundit tregojnë ndryshime në rrugët, e trafikimit të kanabisit me rritjen e trafikimit të kanabisit bimor (marijuanës) dhe hashishit nga Ballkani Perëndimor, sidomos Shqipëria”, nënvizon raporti. Dokumenti thekson më tej se kjo rritje është e lidhur me rritjen e kultivimit të kanabisit në këto vende. Sipas Raportit “marijuana dhe hashishi janë dy produktet kryesore të kanabisit të gjetura në tregun evropian të drogës, ndërsa vaji i kanabisit është relativisht më i rrallë”.

Të dhënat e Raportit Europian për Drogën 2017 i referohen kryesisht informacioneve deri në vitin 2015 ndërkohë që Shqipëria, gjatë vitit të kaluar, njohu një rritje të ndjeshme si të kultivimit edhe të trafikimit të marijuanës, raporton Zëri i Amerikës. Policia shqiptare tha se kreu në të gjithë vendin gjatë vitit 2016 rreth 2.000 operacione policore duke zbuluar 1.700 raste të kultivimit të bimëve narkotike, duke asgjësuar rreth 2.5 milionë bimë narkotike të mbjella në 5211 parcela. Sipas saj, përgjatë vitit 2016 janë identifikuar të përfshirë ne vepra penale për narkotikë 482 autorë, nga të cilët 309 janë arrestuar apo ndaluar, 58 ndjekur në gjendje të lirë dhe 115 autorë janë shpallur në kërkim. Gjatë vitit 2016, “Guardia di Finanza” italiane, i përcolli policisë shqiptare 27 raporte monitorimi, ku ishin evidentuar nga vëzhgimi ajror 2086 parcela të mbjella me marijuanë. Policia shqiptare tha se nga këto koordinata janë verifikuar në terren 99.8% e tyre, janë asgjësuar 738.648 bimë narkotike, të cilat përbëjnë 29 % të totalit të bimëve narkotike të asgjësuara”. Por monitorimet nga ajri mbuluan vetëm një pjesë të territorit. Dhe në fakt më pas, dhjetëra tonë marijuanë u bllokuan në operacione të ndryshme si nga policia shqiptare ashtu dhe nga policitë e vendeve fqinje Greqia dhe Italia.

“Raporti mbi Drogën Europiane 2017”, vlerëson se “produktet e kanabisit përbëjnë pjesën më të madhe të tregut të paligjshëm të drogës me pakicë në Evropë (38%), me një vlerë të parashikuar prej 9.3 miliardë eurosh. Ka gjasa –thekson dokumenti – se kjo shumë varion nga 8.4 miliardë euro në 12.9 miliardë euro”. Ndërkohë vendet e Ballkanit janë evidentuar edhe si një rrugë e rëndësishme e trafikut të heroinës nga Turqia e cila kalon përmes kufijve të Bullgarisë, Rumanisë dhe Greqisë në vendet e Europës Qëndrore.

Sasitë e sekuestruara

Raporti mbi Drogën Europiane 2017 vlerëson se janë raportuar mbi një milion sekuestrime të drogave të paligjshme çdo vit në Evropë. Shumica e këtyre rasteve janë sasi të vogla të kapura përdoruesve, megjithatë, sipas raportit sasia më e madhe e drogave të kapura u përket trafikantëve dhe prodhuesve. Marijuana është droga më e kapur, me mbi 70% të sekuestrimeve në Evropë, kokaina renditet e dyta (9%), e ndjekur nga amfetamina (5%), heroina (5%) dhe MDMA (2%). Sipas raportit, në vitin 2015, ishin 732. 000 konfiskime të produkteve të kanabisit, raportuar në Bashkimin Evropian duke përfshirë 404.000 raste të marijuanës e 288 000 të hashishit. Vlerësohet se 135 ton marijuanë u konfiskua në Evropë në 2015, një rënie prej 38% krahasuar me 217 ton kapur në vitin 2014. Raporti vlerëson se rënie të dukshme u raportuan në Belgjikë, Greqi dhe Itali. Raporti vlerëson se një numër faktorësh mund të jenë pas kësaj rënie të përgjithshme në Europe. “Këto mund të përfshijnë iniciativa për të trajtuar shkallën gjeografike të prodhimit në vende jashtë Bashkimit Evropian, të tilla si Shqipëria”,vlerëson raporti.

Droga në Europë një shqetësim gjithnjë e në rritje

“Në kontekstin global thuhet në raport, Evropa është një treg i rëndësishëm për furnizimin e drogës si për ato të prodhuara në vendet e BE-së dhe për drogat e trafikuara nga rajone të tjera të botës. Raporti vlerëson se Amerika e Jugut, Azia Perëndimore dhe Afrika e Veriut janë burime të rëndësishme për drogat e paligjshme që hyjnë në Evropë, ndërsa Kina është një vend burim për Substanca të reja psikoaktive. Komisioneri Evropian për Migracionin, Çështjet e Brendshme dhe Shtetësinë, Dimitris Avramopoulos, tha se ‘ndikimi i problemit të drogës vazhdon të jetë një sfidë e rëndësishme për shoqëritë evropiane. Mbi 93 milionë evropianë kanë provuar një substancë të paligjshëm në jetën e tyre dhe mbidoza e vdekjeve vazhdon të rritet për të tretin vit me rradhë. Unë jam veçanërisht i shqetësuar, deklaroi Komisionieri i BE-së që sidomos të rinjtë janë të ekspozuar ndaj rrezikut të drogës”. Raporti mbi Drogën në europë 2017 vlerëson se rreth 25 substanca sintetike shumë të fuqishme janë zbuluar në Evropë midis viteve 2009 dhe 2016, prej të cilave vetëm masa të vogla janë të nevojshme për të prodhuar mijëra doza, duke paraqitur një kërcënim në rritje për shëndetin. Raporti Vjetor i Drogës Europiane jep analizat e nevojshme, udhëzimet dhe mjetet për të trajtuar këto kërcënime, jo vetëm për të mbrojtur shëndetin e qytetarëve, por edhe për të ndaluar fitimet e mëdha nga droga.

Vdekjet e mbidozave të drogës në Europë

Raporti nxjerr në pah shqetësimin për numrin në rritje për të tretin vit radhazi të vdekjeve të mbidozave të drogës në Evropë. Një numër prej 8 441 vdekjesh nga mbidozat e drogës , kryesisht të lidhura me heroinë dhe të tjera substanca, vlerësohet të kenë ndodhur në Evropë në vitin 2015 ( 28 vendet anëtare të BE, Turqi dhe Norvegji ).Kjo sipas raportit shënon një rritje prej 6% nga rreth 7 950 vdekje që u shënaun në 30 vende në vitin 2014. Rritjet janë raportuar pothuajse për të gjitha grupmoshat dhe rreth 1.3 milionë përdorues të opiumit në Evropë shihet se janë ndër më të shumtët të pambrojtur.

Dy fëmijë, shtetas amerikanë, janë zhdukur në Tiranë që prej dy ditësh, transmeton TCH.

Nëna e tyre ka njoftuar policinë për largimin e të miturve, 17 dhe 14 vjeç nga banesa, që prej datës 30 maj.

Policia ka nisur punën dhe ka shpërndarë fotografinë e dy fëmijëve amerikanë.

Është një mungesë aparature që nuk lejon të veprojnë në kohë ekspertët tanë mjeko-ligjor që t’u kthejnë përgjigje prokurorëve në lidhje me çështjen e analizave të disa prej personave të lënduar në mitingun hapës të Partisë Demokratike.

Kështu ditën e djeshme bëhet me dije se mjekët kanë kërkuar shtyrjen e afateve të një përgjigjeje për përfundimet konkrete. Sipas të dhënave ata janë shprehur se nuk kanë aparaturën e posaçme që mund të realizojë një zbulim të llojit të lëndës që është përdorur në atë ngjarje.

Ekspertët mendojnë se ajo aparaturë gjendet në Gjermani dhe se për atje janë nisur kampionët e 22 personave që pretendohet që kanë qenë edhe më të prekurit, raporton Shekulli. Kampionët e gjakut mësohet se do të marrin shumë shpejt përgjigje ku edhe do të përcaktohet lënda, ndërkohë që ditën e djeshme Prokuroria ka vijuar hetimet duke bërë të mundur marrjen e dëshmive të disa personave. Po ditën e djeshme është publikuar një video ku shikohet ministri i Brendshëm, Dritan Demiraj, i cili ka refuzuar policia të bllokojë materialet e ndriçimit për të shkuar në duart e hetuesve për shkak se sipas tij nuk duheshin sekuestruar të gjithë.

Filmimi është kryer nga një punonjës policie i cili me sa duket ka qenë aty në momentin kur ministri ka qenë në terren dhe ka refuzuar që të bllokohen të gjitha aparaturat! Po ashtu ditën e djeshme të prekurit kanë dhënë edhe dëshmi të tjera publike në lidhje me momentin që kanë ndjerë shqetësime, ndërsa janë paraqitur në spital orë më vonë. Ndihmë nga Gjermania Referuar të dhënave që vijnë nga Prokuroria bëhet me dije se është kërkuar ndihmë nga autoritetet gjermane për të marrë një përgjigje në kohë rekord mbi incidentin e ndodhur gjatë mitingut të Partisë Demokratike, ku u dëmtuan 146 tubues.

Burimet zyrtare tregojnë se asistenca e të huajve do të kërkohet pasi nga komunikimet me ekspertët e mjekësisë ligjore është thënë se në Shqipëri ky proces zgjat sepse nuk disponohen aparatura të fjalës së fundit. Kjo ekspertizë do të konfirmojë se çfarë elementesh ndodheshin në gjakun e 22 shtetasve, të cilët u regjistruan për ndihmë mjekësore në spital, ndërkohë që pjesa tjetër u paraqiten me shqetësime të lehta. Por, nga ana tjetër, Prokuroria po pret edhe ekspertizën e ushtrisë që këqyri jo vetëm vendngjarjen në një perimetër të caktuar në bulevard, por edhe veshjet e protestuesve që shfaqen dhimbje sysh dhe në trup.

Jo zyrtarisht, thuhet se ekspertiza e Forcave të Armatosura tregon se në bulevard nuk është gjetur asnjë element i rrezikshëm. Por ndërkohë zyrtarisht Prokuroria nuk e regjistroi çështjen hetimore sipas referimit të policisë për dyshimet e ndotjes së ajrit, por për veprën 325 që është pengim i subjekteve elektorale për të zhvilluar aktivitetin e tyre. Ndërsa policia thotë se lëndimi i tubuesve është shkaktuar nga ndriçimi i projektorëve, i pyetur nga prokurorët pronari i kompanisë ka dorëzuar një sërë dokumentesh, sipas të cilave të njëjtët projektorë janë përdorur edhe në mitingje të mëparshme.

Rrëfimi

Një nga aktivistet që u lëndua gjatë mitingut të Partisë Demokratike mbrëmjes e së shtunës ka rrëfyer se si ndodhi ngjarja, ku rreth 140 persona u helmuan në rrethana ende të paqarta. Katerina Mullallai, psikologe e emisionit “Me zemër të hapur”, ka qenë një nga të lënduarit që u transportua me urgjencë në spitalin ‘Nënë Tereza’, në gjendje të rëndë për jetën. Ajo ka treguar dje se kaloi ditë të vështira për shkak të komplikacioneve që shfaqi sapo Lulzim Basha përfundoi fjalën e tij në podium.

Nga ana tjetër ajo pohoi mes të tjerash se ka dyshime që dikush mund të ketë hedhur diçka përreth podiumit ku fliste dhe lideri i PD-së. Mullallai tha se ajo dhe bodygardi i zotit Basha ishin më rëndë. “Jam më mirë mund të them, por kam kaluar një gjendje të rëndë. Fizikisht isha shumë e dëmtuar. Për veç pjesës psikologjike, dhe ajo fizike. Por për fat të mirë jam mirë dhe njeriu duhet t`i kalojë të gjitha”.

Ministri kundër prokurorisë

Ministri i Brendshëm, Dritan Demiraj është filmuar natën në aksion “blic”. Ai ka ndërhyrë në një operacion të prokurorisë për të sekuestruar prozhektorët që dyshohet se kanë shkaktuar helmimin e dhjetëra personave në mitingun hapës të PD, të shtunën! Në një filmim që është botuar edhe në mediat shikohet ministri teknik Demiraj, i cili ndërhyn në hetimet e prokurorisë dhe nuk lejon oficerët e Policisë Gjyqësore që të marrin prozhektorët, si provë për hetimin. Argumenti që ai jep është se prozhektorët i duhen kompanisë për aktivitetin e një subjekti politik. Sipas Prokurorisë, helmimi mund të jetë shkaktuar nga dritat e prozhektorëve, por ende nuk dihet se nga cili prej tyre, pasi vetëm një pjesë e pjesëmarrësve u infektuan. Për të zbuluar se cili nga prozhektorët mund ta ketë shkaktuar ketë efekt dhe nëse kanë qenë prozhektorët shkaktarë, prokuroria ka urdhëruar sekuestrimin e tyre si provë për ekzaminim. Por ndërhyrja e Ministrit, jo vetëm e pengon hetimin, por kompromenton edhe provat hetimore, duke i lënë ato të pambikëqyrura, ndryshe nga sa ka urdhëruar prokurori, i cili është autoriteti i vetëm që vendos mbi hetimin.

Euro ka shënuar rekord të ri të ulët të këmbimit me lekun. Sipas kursit zyrtar të Bankës së Shqipërisë ai dje këmbehej me 134.14 lekë. Euro në tregun vendas ka qenë përgjithësisht e dobët që nga tetori i vitit të kaluar, por dje arriti nivelin më të ulët që nga viti 2009, raporton “Monitor”.

Shqetësimet në lidhje me situatën që ka përfshirë Greqinë, Italinë dhe Bankën Qendrore Europiane, siç shkruan Shekulli, ka zhvlerësuar monedhën e përbashkët në tregjet ndërkombëtare, gjë që është reflektuar edhe në tregun vendas.

Ministrat e Financave të Eurozonës nuk arritën të bien dakord me Fondin Monetar Ndërkombëtar për lehtësimin e borxheve greke apo për disbursimin e kredive të reja ndaj Athinës, ndërkohë që pritet takimi i dytë i palëve në qershor. Ndërsa Banka Qendrore Europiane vendosi që të marrë në konsideratë blerjen e obligacioneve greke vetëm pasi borxhi i Greqisë të jetë cilësuar si i qëndrueshëm

Frika gjeopolitke europiane pati ndikim tek aksionet aziatike, duke forcuar jenin dhe rritur çmimin e arit, megjithëse aktiviteti tregtar ishte i ngushtë dhe disa prej tregjeve qenë të mbyllura për shkak të pushimeve.

Prokuroria ka vendosur që të sekuestrojë projektorët e ndriçimit që u përdorën në mitingun elektoral të Partisë Demokratike të shtunën.

Organi i akuzës dyshon se projektorët kanë qenë shkak i lëndimit të simpatizantëve të PD-së dhe kreut Lulzim Basha. Projektorët do të dërgohen në laborator për hetim.

Në mitingun e PD-së u lënduan 140 persona, mes tyre edhe kreu demokrat Lulzim Basha.

Të gjithë kishin të njëjtat simptoma si skuqje, kruarje dhe djegie të syve apo dhe irritim në fytyrë dhe ne pjesën e qafës. Disa prej tyre kanë shfaqur edhe vështirësi të lehta në frymëmarrje.

Presidenti i Shqipërisë, Bujar Nishani në kuadër të vizitës së punës në Washington D.C, zhvilloi një takim me Senatorin amerikan Bob Dole.

Në një ceremoni të veçantë, në prani të Ambasadorëve të Shqipërisë dhe Kosovës, Zonjës së Parë Odeta Nishani e të ftuarve të nderuar shqiptarë dhe amerikanë, Nishani vlerësoi dhe çmoi me “Dekoratën e Flamurit Kombëtar” Senatorin Robert Joseph Dole me motivacionin “Me mirënjohje të thellë dhe vlerësim të lartë shtetëror ndaj kontributit të çmuar dhe ndihmesës thelbësore dhënë për promovimin dhe zgjidhjen e çështjes kombëtare shqiptare, si dhe për lobimin në Senatin Amerikan në përkrahje të palëkundur të lirisë dhe Pavarësisë së Kosovës”.

Në fjalën e mbajtur me këtë rast, presidenti shqiptar shprehu kënaqësinë dhe privilegjin që me rastin e Ditës së Kujtesës (Memorial Day) kur nderohen sakrificat dhe heronjtë, ka mundësinë “për të vlerësuar dhe nderuar kontributet e çmuara dhe mbështetjen thelbësore të mikut të madh të Shqipërisë dhe shqiptarëve, përkrahësit të palëkundur të çështjes sonë kombëtare dhe zgjidhjes së saj, Senatorit Robert (Bob) Dole”, raporton Koha.net.

Në vijim kreu i shtetit e cilësoi “Senatorin Dole se ka qenë dhe mbetet një nga përkrahësit dhe politikëbërësit amerikanë më me influencë, që jo vetëm ka përkrahur qysh në fillim të viteve ’90-të, por ka ndihmuar zgjidhjen e çështjes shqiptare në Kosovë si dhe përparimin e proceseve demokratike në Shqipëri, duke ndikuar edhe në procesin e paqtimit, dialogut, mirëkuptimit, begatisë dhe orientimit euro-atlantik të mbarë rajonit të Ballkanit”.

“Ju ishit nga të parët që u përpoqët me vendosmëri, që përcaktuat vijën e kuqe të ndalimit të gjenocidit serb ndaj popullsisë civile e të pafajshme shqiptarë në Kosovë, duke lobuar fuqishëm në Senatin amerikan për fitimin e merituar të lirisë e më pas të Pavarësisë së shumëpritur të Kosovës. Për të gjitha këto kontribute, i nderuar Senator Dole, shqiptarët si komb, kudo që jetojnë, ju janë përjetësisht mirënjohës. Prandaj në emër edhe të qytetarëve shqiptarë, në cilësinë e kreut të shtetit dëshiroj t’ju përgëzoj, t’ju falënderoj nga zemra dhe t’ju akordoj dekoratën më të lartë e më të shenjtë për ne: atë të Flamurit tonë Kombëtar”, ka thënë Nishani.

Ai e ka falënderuar senatorin Dole të cilin e ka siguruar se veprat e tij të paharrueshme “do të mbeten përherë të gdhendura në kujtesën dhe mirënjohjen historike të kombit shqiptar”.

Shumë i emocionuar, Senatori Dole e falënderoi presidentin Nishani për këtë vlerësim të lartë, duke kujtuar me nostalgji se “kur kandidoi për President të Shteteve të Bashkuara në vitin 1996, është i sigurt që mori votat e të gjithë shqiptaro-amerikanëve”.

Kreu i LIBRA-s, Ben Blushi është shprehur se Edi Rama i ka kërkuar bashkë me disa ministra që të votojë qeverinë. Blushi tha se qeveria Rama ka rënë për vetëm tre ditë në muajin korrik.

Këtë deklaratë, Blushi e bëri sonte në studion e emisionit “Opinion”, ndërsa theksoi me 10 korrik nuk kanë lënë gjë pa bërë.

Sipas tij, Rama vetë më gjithë ministrat e vet e kanë marrë në telefon, ndërsa e ftonin të votojë për qeverinë, pasi Meta do të ikë.

Blushi bëri me dije se Rama i kërkonte të votonte qeverinë, në shkëmbim të postit të kryetarit të Kuvendit. “Unë i thashë jam duke ikur dhe ika në fakt”, tha Blushi.

Qeveria greke ka dhënë me koncesion pjesët detare dhe tokësore në zonën e veriut deri në Peloponez, nëpërmjet një marrëveshje të nënshkruar në Athinë pasditen e sotme në Ministrinë greke te Energjetikës.

Marrëveshja është arritur mes ministrit Jorgos Stathakis dhe kompanive fituese të koncesioneve.

Ministria greke publikoi vetëm marrëveshjen dhe jo hartën detare, ku do të kryhen kërkimet fizike, duke shtuar dyshimet se ato do të prekin pjesën e negociueshme mes Greqisë dhe Shqipërisë.

Mes zonave të dhëna me koncesion është “Joni 2”, që është kuadrati që shtrihet në veri të ishullit të Korfuzit, një pjesë e të cilit mbivendoset në zonën e diskutueshme mes Shqipërisë dhe Greqisë.