Tahir Batatina kishte qenë njëri ndër trajnerët më të zëshëm sa i përket rifillimit të edicionit 2019/20. Tashmë me konfirmin zyrtar nga Ministria e Shëndetësisë për vazhdimin e kampionatit, klubet veçse i kanë filluar përgatitjet.

Tekniku llapjan në një prononcim për gazetën “Infokus” deklaroi se është i kënaqur me vendimin e fundit, ndërkohë që beson se fusha e blertë është matësi më i mirë për të gjithë.

“Po ashtu siç e kam thënë me herët edhe ashtu u bë, duke kërkuar që të rifillohet kampionati dhe të vendoset gjithçka në fushë, sepse kështu e ka etika e futbollit dhe askush nuk mundet me u ndje i shkelur apo i dëmtuar. Fusha le ti vendos gjërat dhe ajo skuadër që është ma e mira të gjithë do t’ia urojmë”, deklaroi fillimisht Batatina.

Tekniku llapjan për fund deklaroi se Llapi është i qetë dhe i pret skuadrat me qetësi dhe pa temperatura.

“Jam i lumtur që po fillojmë dhe të gjithë lojtarët i kam mirë me shëndet dhe familjet e tyre janë mirë. Kjo ka rendësi për mua, ndërsa Llapi i ka të gjitha gjasat që ta kap Evropën, sepse kam super skuadër dhe jemi kompletuar tash dhe as një lojtar nuk me mungon vetëm talenti, Premtim Jakupi që nuk do ta rrezikoj deri në kampionatin e ri. Llapi është i qetë dhe i pret skuadrat me qetësi dhe pa temperatura”, përfundoi Tahir Batatina.